ᐱᓕᕆᔪᑦ ᑐᓴᕐᓂᖅᑐᓕᐅᖅᑎᑦ
ᐱᔾᔪᑎᖓ ᐱᓕᕆᔪᑦ ᑐᓴᕐᓂᖅᑐᓕᐅᖅᑎᑦ
ᔨᕐᒪᐃᓐ ᐊᕐᓇᑦᑕᐅᔪᖅ
ᔨᕐᒪᐃᓐ ᐊᕐᓇᑦᑕᐅᔪᖅ-ᔨᕐᒪᐃᓐ ᐊᕐᓇᑦᑕᐅᔪᖅ ᐃᓄᒃ ᑕᑯᒥᓇᖅᑐᓕᐅᖅᑎ, ᑎᑎᕋᖅᑎ, ᑎᑎᖅᑐᒐᖅᑎ, ᐃᒡᓗᓕᖕᒥᐅᖅ, ᓄᓇᕗᒻᒥ. ᖃᐅᔨᒪᔭᐅᒻᒪᕆᒃᑐᖅ ᑎᑎᖅᑐᒐᖃᑦᑕᖅᓯᒪᔭᖏᓐᓄᑦ ᐃᓗᓕᐅᖅᓯᒪᔭᖏᓐᓄᓪᓗ ᐃᓄᐃᑦ ᐱᖖᒍᕐᓂᕕᓂᖏᓐᓂᒃ, ᐃᓅᓯᑐᖃᕐᒥᒡᓗ, ᐊᕐᓇᐅᓪᓗ ᐅᓂᒃᑳᖏᓐᓂᒃ. 1999ᒥ, ᓴᓇᓚᐅᖅᓯᒪᒋᕗᖅ 2-ᑖᓚᒦᑦᑐᒃᓴᕐᒥᒃ ᐃᖅᑲᐅᒪᔭᐅᔾᔪᑕᐅᓪᓗᓂ ᓄᓇᕗᖖᒍᖅᑎᓪᓗᒍ. ᑎᑎᕋᖃᑎᖃᖅᓯᒪᒋᕗᖅ, ᒋᐅ ᐆᒥ, ᐊᑎᕋ ᐊᕐᓇᑦᑕᐅᔪᕐᒥ: ᐃᓅᓯᖓᓂᒃ ᑕᑯᒥᓇᖅᑐᓕᐅᖅᑎᐅᑉ ᔨᕐᒪᐃᓐ ᐊᕐᓇᑦᑕᐅᔪᖅ. ᔭᓗᓇᐃᒥᐅᑕᖅ, ᓄᓇᑦᓯᐊᕐᒥ.
ᓗᐃᔅ ᕝᓚᕼᐅᕐᑎ
ᓗᐃᔅ ᕝᓚᕼᐅᕐᑎ-ᓗᐃᔅ ᐱᕈᖅᓴᓯᒪᔪᖅ ᑲᖏᖅᑐᒑᐱᖕᒥ, ᓄᓇᕗᒻᒥ. ᓱᕈᓯᐅᑎᓪᓗᒍ, ᓗᐃᔅ ᑐᓵᖃᑦᑕᖅᓯᒪᕗᖅ ᐅᓂᒃᑳᖅᑐᐊᖅᑎᓂᒃ. ᐃᑦᑐᒃᑯᒋᓚᐅᖅᑕᒥᓄᑦ ᐃᓄᒃᑎᑐᑦ ᐅᖃᐅᓯᖓᓂᒃ ᔭᒐᐃᔾᔭᐃᖅᓯᑎᑕᐅᓯᒪᕗᖅ, ᑐᑭᓯᐅᒪᓪᓗᓂᓗ ᐃᓄᒃᑎᑐ ᐅᖃᕈᓐᓇᕐᓂᖅ ᑐᖖᒐᕕᓪᓚᕆᐅᓂᖓᓂᒃ ᐃᓄᐃᑦ ᑭᓇᐅᓂᖓᓄᑦ. 2005ᒥ, ᓗᐃᔅ ᐱᒋᐊᖅᑎᑦᑎᖃᑕᐅᓚᐅᖅᓯᒪᔪᖅ ᐃᓐᕼᐋᐱᑦ ᒦᑎᐊᒥ Inc, ᐅᖃᓕᒫᒐᓕᐅᖅᑎᑦ ᑲᔪᖏᖅᑐᑦ ᑐᖅᑯᐃᔪᒪᓪᓗᑎᒃ ᓴᖅᑯᒪᑎᑦᑎᓗᑎᒡᓗ ᐃᓄᐃᑦ ᖃᐅᔨᒪᔭᖖᒋᓐᓂᒃ ᐱᒻᒪᕆᐅᒋᔭᖏᓐᓂᒃ, ᐃᓄᒃᑎᑐᓪᓗ ᐅᖃᐅᓯᕐᒥᒃ. ᐃᓐᕼᐋᐱᑦ ᒦᑎᐊ ᐊᒥᓱᐊᓗᖕᓂᒃ ᐅᖃᓕᒫᒐᓕᐅᖅᓯᒪᓕᖅᑐᑦ ᐃᓄᒃᑎᑐᓪᓗ ᐱᓕᕆᔾᔪᑎᓂᒃ ᐃᓕᓴᐃᔾᔪᑕᐅᕙᓕᖅᑐᓂᒃ ᐃᓕᓐᓂᐊᕐᕕᐊᕈᓯᕐᓂᒃ ᓄᓇᕗᒻᒥ.
ᒋᔫᒻ ᐃᑦᑐᒃᓵᕐᔪᐊᑦ ᓴᓚᑎᓐ
ᒌᔫᒻ ᓴᓚᑎᓐ-ᐃᓅᔪᕕᓂᖅ ᐃᓅᓯᕐᒥᒃ ᖃᐅᔨᓇᓱᒃᑎᓄᑦ ᐃᓚᔮᕇᓄᑦ, ᒌᔪᒻ ᐱᕈᖅᓴᖅᓯᒪᔪᖅ ᐃᓅᓯᖓᑕ ᐃᓚᖓᓂ ᐃᒡᓗᓕᖕᒥ ᐊᕐᕌᒍᖃᓕᕋᓱᖕᓂᕐᒥᓂᒃ 15ᓂᒃ. ᐃᓕᓐᓂᐊᕇᕐᒪᑦ ᐱᔪᓐᓇᐅᑎᑖᖅᑐᓂ ᐃᓅᓯᕐᒥᒃ ᐃᓕᓐᓂᐊᕐᓂᕐᒥᒃ ᑐᓴᖃᑦᑕᐅᑎᓂᕐᒥᒡᓗ UQAM ᓯᓚᑦᑐᖅᓴᕐᕕᒡᔪᐊᕐᒥ 1998ᖑᑎᓪᓗᒍ, ᐱᒋᐊᖅᑎᑦᑎᖃᑕᐅᓚᐅᖅᓯᒪᕗᖅ ᐋᖅᓯᒥ ᐃᓕᓐᓂᐊᖅᐸᓪᓕᐊᓪᓗᓂ ᑲᓇᑕᓕᒫᒥ ᐊᕿᑦᑐᖓᓴᖕᓂᕐᒧᑦ ᐃᓕᓐᓂᐊᕐᕕᖕᒥ ᒪᓐᑐᕆᐊᓪᒥ. 2001ᒥ, ᒌᔪᒻ ᐱᖃᑕᐅᓕᓚᐅᖅᓯᒪᒋᕗᖅ Cirque Éloize ᖃᖓᑕᐅᕋᐅᔭᖅᑎᓄᑦ ᓇᕈᓪᓗᑎᒃ ᑕᐃᔭᕐᒥ Nomade, ᑐᑭᒧᐊᒃᑎᑕᐅᓪᓗᓂ ᖃᐅᔨᒪᔭᐅᔪᒻᒪᕆᖕᒧᑦ ᑕᓂᐊᓪ ᕕᓐᓯ ᐸᔅᑲᒧᑦ. 2005ᒥᓂᑦ, ᒌᔪᒻ ᑲᔪᖏᖅᓯᒪᔪᖅ ᐱᓕᕆᐊᕆᓪᓗᓂᐅᒃ ᐱᓕᕆᖃᑎᖃᖅᑐᓂᓗ ᐋᖅᓯᒃᑯᓐᓂ ᐃᒡᓗᓕᖕᒥ ᐃᓅᓯᖃᑦᑎᐊᕋᓱᐊᕐᓂᕐᒥᒃ ᑐᕌᒐᖃᖅᑐᓂ ᒪᒃᑯᒃᑐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.
ᐱᒋᐊᖅᑎᑦᑎᖃᑕᐅᓯᒪᔪᖅ ᑕᑯᒥᓇᖅᑐᓂᒡᓗ ᑐᑭᒧᐊᒃᑎᑦᑎᔨᐅᖃᑎᖃᖅᑐᓂ ᐋᖅᓯᒃᑯᑦ, ᐊᕿᑦᑐᖓᓴᒃᑎᑦ ᐱᓕᕆᖃᑎᒌᑦ ᐃᒡᓗᓕᖕᒥ ᑲᓱᖅᑎᑦᑎᓇᓱᒃᑐᑦ ᐃᓄᐃᑦ ᐱᖅᑯᓯᖅᑐᖃᖏᓐᓂᒃ ᒫᓐᓇᓗ ᑕᑯᕋᓐᓈᖅᑕᐅᕙᒃᑐᓂᒃ. ᑕᑯᕋᓐᓈᖅᑎᑦᑎᖃᑕᐅᓯᒪᒋᕗᖅ Timber (Cirque Alfonse), Projet Fibonacci (7 Doigts), Nomade (Cirque Éloize), ᐅᕙᓂ Théâtre du Nouveau Monde’s ᑕᑯᕋᓐᓈᒐᒃᓴᒥ Moby Dick ᑕᕐᕆᔮᒥ Ce qu’il faut pour vivre ᐊᒻᒪ ᐅᕙᖓ.
ᑎᐅᕆ ᐅᔭᕋᒃ
ᑎᐅᕆᓐᔅ ᐅᔭᕋᒃ-ᑎᐅᕆᓐᔅ ᐅᔭᕋᒃ ᓇᖕᒥᓂᖅ ᐃᓕᑦᑎᓯᒪᔪᖅ ᐃᖖᒋᕐᓂᕐᒥᒃ/ᓂᔾᔭᐅᓯᔭᕐᓂᕐᒥᒡᓗ ᓂᔾᔭᐅᓯᔭᖅᑎᐅᓪᓗᓂ ᐃᒡᓗᓕᖕᒥ, ᓄᓇᓕᕋᓛᖑᓂᖅᓴᖅ ᐃᓄᐃᑦ ᓄᓇᓕᖓᑦ ᐅᑭᐅᖅᑕᖅᑑᑉ ᑭᒡᓕᖓᑕ ᖁᓛᓃᑦᑐᖅ ᑲᓇᑕᒥ ᕿᑭᖅᑖᓘᑉ ᐃᓚᖓᓂ ᓄᓇᕗᒻᒥ. ᐃᒡᓗᓕᒃ ᓄᓇᑦᑎᐊᕙᐅᖃᑕᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓃᑦᑐᖅ, ᐃᓄᐃᑦ ᐅᖃᐅᓯᖓᑦ ᐃᓕᖅᑯᓯᖓᓪᓗ ᓴᖅᑯᒪᑦᑎᐊᖅᑐᓂ ᐃᓅᓯᐅᓪᓗ ᐃᓚᒋᑦᑎᐊᖅᑐᓂᒋᒃ, ᓄᓇᓖᓪᓗ ᐱᓕᕆᖃᑎᒌᑦᑎᐊᓲᖑᓪᓗᑎᒃ.
ᑎᐅᕆᐅᑉ ᓂᔾᔭᐅᑎᓕᐊᕕᓂᖓ ᓄᓇᕐᔪᐊ ᐃᓱᓕᖏᓐᓂᖓᓂ ᓴᖅᑭᑕᐅᓚᐅᖅᑐᖅ ᔭᐃᔅ ᓚᓯᒃᒧᑦ ᐊᑦᑎᑦᑎᐊᖅᑐᓂᐅᒃ ᑲᑎᓯᒪᑦᑎᐊᖅᑐᑎᒃ ᐅᓂᒃᑳᖅᑐᐊᕐᓂᖅ, ᓄᓇᒦᖖᒑᖅᑐᓂᒃ ᑐᓴᖅᓴᐅᑎᑦᑎᓂᖅ ᐃᖖᒋᕐᓂᕐᓗ ᓈᓚᒃᑐᒥᒃ ᓇᕈᖃᑕᐅᔪᓐᓇᖅᑎᑦᑎᓇᓱᐊᖅᑐᓂ, ᕿᒧᒃᓯᒃᑯᑦ, ᓄᓇᕐᔪᐊᑉ ᐃᓱᐊᓄᑦ. ᐅᔭᕋᐅᑉ ᐃᖖᒋᐅᓯᐅᕐᓂᖓᑕ ᐊᑯᓐᓂᖓᓂ, ᑐᓴᖅᓴᐅᑎᑦᑎᒋᕗᖅ ᐅᐃᒋᔭᐅᓂᕐᒥᓂᒃ, ᐊᑖᑕᐅᓂᕐᒥᓂᒃ, ᐊᖑᓇᓱᒃᑎᐅᓂᕐᒥᓂᒡᓗ; ᐃᒡᓗᓕᖕᒥ ᐃᓐᓇᖅ ᓴᐃᒪᓐ ᖃᒪᓂᖅ ᐅᓂᒃᑳᖅᑐᐊᕆᕗᖅ, ᓇᑭᖖᒑᓯᒪᓂᖏᑦ ᑕᑯᒃᓴᐅᔫᔮᓕᖅᐸᒃᐳᖅ ᓈᓚᑦᑎᓪᓗᑎᑦ.
ᑎᐅᕆ ᐋᓪᓚᐅᖖᒋᓚᖅ ᓄᓇᕗᒻᒥ ᓂᔾᔭᐅᓯᔭᖅᑎᖏᓐᓄᑦ, ᖁᓕᐅᓗᐊᖅᑐᑦ ᐊᕐᕌᒍᑦ ᐱᖖᒍᐊᖅᑎᐅᖃᑕᐅᓚᐅᖅᑐᖅ ᐱᓪᓚᕆᒃᑎᐅᓪᓗᓂ, ᐃᓪᓗᑭᓵᖅᑎᐅᓪᓗᓂ ᓂᔾᔭᐅᓯᔭᖅᑎᐅᓪᓗᓂᓗ, ᓄᓇᕐᔪᐊᕐᒥᓪᓗ ᓇᕈᓯᒪᕗᖅ ᐃᓄᐃᑦ ᐊᕿᑦᑐᖓᓴᒃᑎᓄᑦ ᐃᓚᒋᔭᐅᓪᓗᓂ, ᐋᖅᓰᖅ. ᐊᖑᓇᓱᒋᐊᒃᓴᖅ ᖁᕕᐊᒋᔭᓕᒃ, ᐱᖃᑕᐅᖃᑦᑕᖅᓯᒪᕗᖅ ᐋᖅᓯᒃᑯᑦ ᓄᓇᒦᑦᑕᖅᑐᕌᖓᑕ. ᑎᐅᕆ ᐱᖖᒍᐊᖃᑕᐅᓯᒪᒋᕗᖅ ᐋᖅᓯᒃᑯᓐᓂᑦ ᕚᓐᑰᕗᒥ ᐅᓕᒻᐱᒃ ᐱᖖᒍᐊᕕᔾᔪᐊᖅᑎᓪᓗᒋᑦ, ᑯᐃᓐ ᐃᓕᓴᐱᐅᑉ ᑕᐃᒪᓐ ᔫᐱᓖᖓᓂ ᐊᓯᖏᓐᓂᒡᓗ ᖁᕕᐊᓲᑎᖃᖅᑎᓪᓗᒋᑦ 4 ᓈᓚᒐᕕᖕᓂ ᓄᓇᕐᔪᐊᕐᒥ. ᐅᔾᔨᕐᓇᓛᖑᒻᒥᔪᖅ, ᑎᐅᕆ ᐊᖑᓇᓱᒃᑎᓪᓚᕆᐅᖕᒪᑦ ᖃᐅᔭᒪᔭᑐᖃᕐᓂᒡᓗ ᐸᐸᑦᑎᔨᐅᓪᓗᓂ, ᐱᓕᕆᐊᖏᑎᒍᑦ ᓴᖅᑭᓲᖑᓪᓗᑎᒃ.
ᒫᓐᓇᕋᑖᖅ, ᑎᐅᕆ ᑐᑭᒧᐊᒃᑎᑦᑎᔨᐅᖃᑎᖃᓚᐅᖅᐳᖅ ᐱᖖᒍᐊᖅᑐᓂᒡᓗ ᐊᔾᔨᒌᖖᒋᑦᑐᑦ ᐱᓕᕆᖃᑎᒌᑦᑎᓪᓗᒋᑦ ᓴᖅᑮᓪᓗᓂ, ᐅᓂᒃᑳᖅᑐᐊᖅ, ᓇᕈᓚᐅᖅᓯᒪᔪᖅ ᑲᓇᑕᒥ 2020ᒥ.
ᓵᓚᑦ ᖃᒪᓂᖅ
ᓵᓚᑦ ᖃᒪᓂᖅ-ᓵᓚᑦ ᖃᒪᓂᖅ ᐅᐊᖕᓇᖓᓂᒥᐅ ᕿᑭᖅᑖᓘᑉ ᐃᓅᓪᓗᓂ ᑕᑯᕋᓐᓈᖅᑎᑦᑎᔨ, ᐱᓪᓚᕆᖖᒍᐊᖅᑎ, ᑲᑕᔾᔭᖅᑎ, ᐃᓄᒋᐊᖕᓂᓪᓗ ᐅᖃᓪᓚᒃᑎᐅᓪᓗᓂ. ᐃᒡᓗᓕᖕᒥᐅᒃᓴᔭ, ᓄᓇᕗᒻᒥ ᐃᖅᑲᓇᐃᔭᖃᑎᖃᖅᓯᒪᔪᖅ ᓄᓇᖃᖅᑳᖅᓯᒪᔪᓂᒃ 2015ᒥᓂᑦ ᐃᓕᓐᓂᐊᖅᑎᑦᑎᓪᓗᓂ ᐃᓕᖅᑯᓯᕐᓂᒃ ᑐᑭᓯᐊᓕᕐᓂᕐᒥᒃ ᑐᖖᒐᕕᖃᖅᑐᓂ ᐅᖃᕈᓐᓇᕐᓂᕐᒥᓂᒃ ᒪᕐᕉᖕᓂᒃ ᐅᖃᐅᓰᖕᓂᒃ (ᐃᓄᒃᑎᑐᑦ ᖃᓪᓗᓈᑎᑐᓪᓗ) ᐃᓅᓪᓗᓂ ᐊᕐᓇᐅᓪᓗᓂ ᓄᓇᓕᕋᓛᖑᓂᖅᓴᒥᐅᑕᐅᓂᑯ ᓄᓇᓕᕐᔪᐊᕐᒥᓪᓗ. ᐱᓕᕆᐊᕆᓲᖏᑦ ᐃᓄᐃᑦ ᐃᓅᖃᑎᖃᕐᓂᖏᓐᓂᒃ, ᑲᓇᑕᐅᓪᓗ ᒐᕙᒪᒃᑯᖏᓐᓂᒃ ᐃᓄᒋᐊᓂᓗ, ᓇᖕᒥᓂᖅᓱᕋᓱᐊᕐᓂᖏᓐᓂᒃ ᓯᖏᑦᑎᓲᓂᒃ ᐱᓕᕆᕕᖏᓂ.
ᐱᓕᕆᐊᖓᑕ ᖄᒃᑲᓐᓂᐊᒍᑦ ᓄᓇᖃᖅᑳᖅᓯᒪᔪᓂ ᐱᓕᕆᖃᑎᒌᓂ, ᓵᓚᑦ ᐃᓕᓴᐃᓯᒪᒻᒥᔪᖅ K-12 ᐃᓕᓐᓂᐊᖅᑎᓂᒃ ᐃᓄᐃᑦ ᐃᓕᖅᑯᓯᖓᓂᒃ ᐊᑐᓚᐅᖅᑕᕕᓂᖏᓐᓂᒡᓗ ᐃᓅᖃᑎᒌᒃᑯᑦ (ᐋᑐᐊᒥ ᐃᓄᐃᑦ ᓱᕈᓰᑦ ᐅᐸᒐᕕᓂᐊ) ᑲᓱᖅᑎᑦᑎᓇᓱᖕᓂᕐᒥᒃ. 2009-2015 ᐱᓕᕆᐊᖃᖅᐸᓚᐅᖅᓯᒪᖕᒥᔪᖅ ᐃᓕᖅᑯᓯᕐᒥᒃ ᓴᖅᑭᔮᖅᑎᑦᑎᔨᐅᓪᓗᓂ, ᐱᓕᕆᐊᖑᓂᐊᖅᑐᓂᒡᓗ ᐊᐅᓚᑦᑎᔨᐅᓪᓗᓂ, ᐃᑲᔪᕆᐊᖅᑎᐅᓪᓗᓂ ᑐᖖᒐᓱᕝᕕᖓᑦ ᐃᓄᐃᒃᑯᓐᓄᑦ. 2014ᒥ ᓵᓚᑦ ᓇᓗᓇᐃᖅᑕᐅᓚᐅᖅᓯᒪᒋᕗᖅ ᑲᓇᑕᓕᒫᒥ ᐃᔾᔪᐊᒐᒃᓴᑦᑎᐊᕙᐅᒋᔭᐅᓪᓗᓂ ᑲᓇᑕᓕᒫᒥ ᓄᓇᖃᖅᑳᖅᓯᒪᔪᑦ ᐃᓱᐊᖅᑐᓕᕆᓂᕐᒥᒃ ᑎᒥᖁᑎᖓᓄᑦ ᑕᐃᔅᓱᒪᓂᔅᓴᐃᓐᓇᖅ ᐊᕐᕌᒍᒥ ᐃᓚᒋᔭᐅᓚᐅᕆᕗᖅ ᑲᑎᒪᔨᖏᓐᓄᑦ ᑲᓇᑕᓕᒫᒥ ᒪᒃᑯᒃᑐᑦ ᐊᕐᓇᐃᑦ ᑲᑎᒪᔨᖏᓐᓄᑦ, ᑐᕌᒐᖃᖅᑐᑎᒃ ᐊᑕᐅᓯᐅᖃᑎᒌᖕᓂᕐᒥᒃ ᓄᖅᑲᖅᑎᑦᑎᓇᓱᒃᑐᑎᒃ ᓂᖓᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ.
2005ᒥ ᓵᓚᑦ ᐱᖃᑕᐅᓚᐅᖅᓯᒪᖕᒥᔪᖅ ᒪᒃᑯᒃᑐᑦ ᐃᓅᓯᕐᒥᓂᒃ ᑭᐱᓯᑎᑦᑕᐃᓕᒪᓂᕐᒥᒃ ᐱᓱᒃᑎᓪᓗᒋᑦ ᑕᓐᑲᓐ ᐳᕆᑎᔅ ᑲᓚᒻᐱᐊᒥ ᐋᑐᐊᒧᑦ ᐋᓐᑎᐅᕆᐅ, ᐅᔾᔨᖅᓱᖅᑎᑦᑎᓇᓱᐊᖅᑐᑎᒃ ᒪᒃᑯᒃᑐᑦ ᐃᓅᓯᕐᒥᓂᒃ ᑭᐱᓯᖃᑦᑕᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᑲᓇᑕᓕᒫᒥ. ᑕᐃᔅᓱᒪᓂᔅᓴᐃᓐᓇᖅ ᐊᕐᕌᒍᒥ ᓵᓚᑦ ᐱᒋᐊᖅᑎᑦᑎᓚᐅᖅᓯᒪᒋᕗᖅ ᑲᑕᔾᔭᖃᑎᖃᖃᑦᑕᖅᑐᓂ ᓯᓪᓚ ᓯᓐᑎᐊ ᐱᑦᓯᐅᓛᕐᒥ, ᐃᖖᒋᖅᑏᒃ ᑲᑎᑦᑎᕙᒃᑐᒃ ᑲᑕᔾᔭᐅᓯᑐᖃᕐᒥᒃ ᐅᓪᓗᒥᓯᐅᑎᒥᒡᓗ (ᐃᓄᐃᑦ ᑲᑕᔾᔭᐅᓯᖓᓂ) ᖃᓄᐃᑦᑐᑐᐃᓐᓇᕐᓂᒃ. ᓄᓇᕐᔪᐊᓕᒫᒥ ᐊᐅᓪᓚᖃᑦᑕᖅᓯᒪᔪᒃ ᑕᑯᓐᓇᖅᑎᑦᑎᔭᖅᑐᖅᑐᑎᒃ ᓂᕈᐊᒐᒃᓴᐅᑎᑕᐅᓯᒪᓪᓗᑎᒡᓗ ᔫᓄᒧᑦ ᑕᐃᔭᐅᓪᓗᑎᒃ ᓯᓪᓚ ᒪᑭᓐᓂᖅ, ᐊᑕᐅᓯᐊᖅᑐᑎᒃ 2017ᒥ ᑐᓴᕐᓂᕐᓂᖅᐸᐅᓂᕋᖅᑕᐅᓚᐅᖅᓯᒪᖕᒥᔪᒃ ᐊᕐᕌᒍᓕᒫᖅ, ᓱᓕᓗ 2019ᒥ ᓄᓇᕐᔪᐊᕐᒥ ᑐᓴᕐᓂᓛᓂᕋᖅᑕᐅᓪᓗᑎᒃ. ᓱᓕᓗ ᔫᓅᒧᑦ ᓂᕈᐊᒐᒃᓴᓕᐊᖑᒃᑲᓐᓂᕐᓂᕆᓪᓗᓂ 2023ᖑᑎᓪᓗᒍ ᑲᑕᔾᔭᖃᑎᒋᕙᒃᑕᖓᓗ ᐃᕙᓗᐊᕐᔪᒃ ᑳᖦᓖᓐ ᒥᐅᕆᑦ ᓄᓇᖃᖅᑳᖅᓯᒪᔪᑦ ᓂᔾᔭᐅᓯᔭᑦᑎᐊᕐᓂᖏᓐᓄᑦ ᑖᔅᓱᒪᓂ ᐊᕐᕌᒍᒥ.
ᐃᖅᑲᓇᐃᔭᖖᒋᑦᑕᕌᖓᒥ ᓵᓚᑦ ᐃᓕᖅᑯᓯᕐᒥᓂᒃ ᓴᖅᑭᔮᖅᑎᑉᐸᑉᐹ ᐃᓕᑦᑎᓪᓗᓂ ᐃᖖᒋᐅᓯᑐᖃᕐᓂᒃ ᕿᓚᐅᔾᔭᕐᓂᕐᒥᒃ, ᒥᖅᓱᕐᓂᕐᒥᒃ ᐊᓐᓄᕌᑐᖃᕆᔭᐅᕙᓚᐅᖅᑐᑐᑦ, ᓴᐸᖖᒋᕆᓪᓗᓂᓗ.
ᑯᕆᔅᑏᓐ ᑐᑐ
ᑯᕆᔅᑏᓐ ᑐᑐ-ᑯᕆᔅᑏᓐ ᑐᑐ ᑐᑭᓯᑲᐅᑎᒋᔭᒃᓴᐅᖖᒋᑦᑐᖅ ᓄᓱᐊᖅᓯᔫᔮᓲᖅ ᐱᓪᓚᕆᒃᑎᖖᒍᐊᖅ ᑕᕐᕆᔮᒃᓴᓂᑦ ᖁᖖᒋᐊᖅᑕᐅᓂᕙᒃᑐᓂᓗ, ᑕᑯᒃᓴᐅᓪᓚᕆᕋᑖᓚᐅᖅᑐᖅ ᐱᓕᕆᐊᖃᖅᑎᓪᓗᒋ ᑭᕕᐅᑉ ᐅᑎᕐᓂᖓᓂᒃ, ᖃᒡᒋᐊᕘᒃᑯᑦ ᐃᓄᐃᑦ ᖁᖖᒋᐊᖅᑎᑦᑎᔨᖏᓐᓂᒃ ᓇᕈᓇᓚᐅᖅᑐᖅ ᑲᓇᑕᐅᑉ ᓂᒋᐊᓂ ᐅᑭᐅᖅᑕᖅᑐᖓᓂᓗ 2017ᒥ. ᑭᕕᐅᑉ ᐅᑎᕐᓂᖓ ᓄᓇᕐᔪᐊᕐᒥ ᓴᖅᑭᔮᖅᑎᑦᑎᓪᓗᒋᑦ ᓅᒻᒥ, ᑲᓛᖠᑦ ᓄᓇᖓᓐᓂ ᑕᑯᒃᓴᐅᓚᐅᖅᑐᖅ ᓄᓇᑦᑕ ᐃᓯᒌᓈᖅᑎᓯᓴᕐᕕᐊᓂ ᓯᑎᐱᕆ 2018ᒥ, ᑕᖅᑭᓕᒫᕐᓗ ᓴᖅᑭᔮᕐᓂᕆᓪᓗᓂ 2019ᒥ ᑖᕋᒐᓐ ᖁᙱᐊᖅᑕᐅᕕᖕᒥ ᑐᕌᓐᑐᒥ; ᑯᕆᔅᑏᓐ ᐱᖃᑕᐅᖖᒋᓐᓇᓚᐅᖅᑐᒃ ᑖᒃᑯᓂᖓ ᒪᕐᕉᖕᓂᒃ.
ᑯᕆᔅᑏᓐ ᓴᖅᑭᔮᔪᒋᕗᖅ ᐊᓂᒥ ᑕᕐᕆᔮᒃᓴᒥ ᐃᖃᓗᖕᓂ ᑯᐸᐃᖕᒥᐅᑕᕐᒧᑦ ᑐᑭᒧᐊᒃᑎᑦᑎᔨᒧᑦ ᐱᓄᐃᑦ ᐱᐅ 2016 ᓴᖅᑭᑎᑕᒥᒃ.
ᕿᓚᐅᔾᔭᖅᑎᐅᓯᒪᖕᒥᔪᖅ ᑲᑕᔾᔭᖅᑎᐅᓪᓗᓂᓗ ᐃᓄᒃᓱᒃ ᕿᓚᐅᔾᔭᖅᑎᓂᒃ ᐋᑐᐊᒨᖅᓯᒪᑎᓪᓗᒋᑦ, P.E.I, ᐅᐃᑦᕼᐅᐊᕐᔅᒧᑦ ᒍᕌᓐ ᐳᕆᐅᕆᒧᓪᓗ ᐃᓕᓐᓂᐊᕐᕕᐊᕐᓗᖕᒥ ᐃᓕᓐᓂᐊᖃᑕᐅᑎᓪᓗᒍ.
ᑯᔅᑏᓐ ᐃᖖᒋᐅᓯᔭᓕᒪᒋᕗᖅ, ᐃᓕᓴᐃᖃᑎᖃᖅᑐᓂ ᐃᓄᖕᓂᒃ ᐊᔪᖖᒋᑦᑐᐊᓗᖕᓂᒃ, ᓯᒥᐅᓂ ᑮᓇᐃᓐᓇᕐᒥ, ᔭᐃᐱᑎ ᓄᖖᒐᕐᒥᓪᓗ.
ᐃᓕᓐᓂᐊᖅᑎᑦᑎᖃᑦᑕᖅᓯᒪᖕᒥᔪᖅ ᓄᓇᕗᒻᒥ, ᐱᓕᕆᖃᑎᖃᖃᑦᑕᖅᓯᒪᓪᓗᓂ 400 ᐅᖓᑖᓄᑦ ᒪᒃᑯᒃᑐᓂᒃ ᐊᕐᕌᒎᖕᓂ ᒪᕐᕉᖕᓂᒃ ᐃᓕᓴᐃᓪᓗᓂ ᐱᓯᑐᖃᕐᓂᒃ (ᐃᖖᒋᐅᑎᑦ), ᑲᑕᔾᔭᕐᓂᕐᒥᒃ, ᐱᓪᓚᕆᖖᒍᐊᕐᓂᕐᒥᒡᓗ.
ᔮᓱᐊ ᖃᐅᒻᒪᒋᐊᖅ
ᔮᓱᐊ ᖃᐅᒻᒪᒋᐊᖅ- ᑐᕋᐃᑦ-ᐋᕝ ᓯᕗᓕᖅᑎᖓ, ᔮᔅ ᖃᐅᒻᒪᒋᐊᖅ ᓂᔾᔭᐅᓯᔭᖃᑦᑕᖅᓯᒪᓕᖅᑐᖅ ᐊᕐᕌᒍᖃᕐᓂᕐᒥᓂᒃ 18-ᓂᒃ. ᐃᓅᓯᒪᔪᖅ ᐱᕈᖅᓴᓪᓗᓂᓗ ᐃᖃᓗᖕᓂ, ᓄᓇᕗᒻᒥ, ᐊᖏᕋᕆᓪᓗᓂᐅᓪᓗ ᓱᓕ, ᔮᔅ ᐱᒋᐊᖅᑎᑦᑎᖃᑎᒋᓯᒪᒻᒥᔭᖓᑦᑕᐅᖅ ᔨᐊᕝ ᒧᕇᔅ ᐱᓕᕆᖃᑎᒌᒃᓯᒪᓕᖅᑑᒃ 2012ᒥᓂᑦ ᐱᒋᐊᖅᑎᑦᑎᓪᓗᑎᒡᓗ ᑐᕋᐃᑦ-ᐋᕝᒥᑦ. ᐊᔾᔪᒥᒍᓱᒃᑐᑎᒃ ᕋᐃ ᑦᓵᕈᓪᔅᒥᒃ, ᔫ ᑳᑯᒥᒃ, ᐸᑎ ᒐᐃᒥᒃ ᐊᒻᒪ ᒋᐅᕆ ᑲᓛᒃ ᓄᑲᖅᑎᕐᒥ, ᔮᔅ ᐱᔾᔪᑎᖃᖅᐸᒃᑐᖅ ᐊᑐᖅᓯᒪᔭᕐᒥᓂᒃ ᓄᓇᕗᒻᒥ ᐱᔭᕐᓂᖖᒋᑦᑐᓂᒡᓗ ᑎᑎᕋᖅᑎᓪᓗᒋᑦ ᐆᒥᖓ ᑕᕐᓂᕐᒨᖓᔪᒥᒃ ᐃᖖᒋᐅᒻᒥᑦ. ᐊᑯᑦᑎᓪᓗᑎᒃ ᖃᓪᓗᓈᑎᑐᑦ ᐃᓄᒃᑎᑐᓪᓗ, ᑐᕋᐃᑦ-ᐋᕝ ᐃᖖᒋᓲᑦ ᐅᑭᐅᖅᑕᖅᑐᒥ ᓴᐃᓕᔮᕐᓇᖅᑐᓂᒃ ᓄᓇᕐᔪᐊᕐᒥ ᐱᔾᔪᑕᐅᒐᔪᓂᑐᓂ ᖃᐅᒪᓂᕐᒥᒃ, ᑖᕐᓂᕐᒥᒃ, ᖃᓂᒌᖕᓂᕐᒥᒃ, ᐃᓄᑑᔮᕐᓂᕐᒥᒡᓗ, ᐊᓯᖏᓐᓂᒡᓗ ᐅᑭᐅᖅᑕᖅᑐᒥ ᐊᑐᖅᑕᐅᕙᒃᑐᓂᒃ ᖃᐅᑕᒫᑦ.
ᓖᕕ ᑕᐹᑦᑎᐊᖅ
ᓖᕕ ᑕᐹᑦᓯᐊᖅ-ᐃᓕᓐᓂᐊᕇᑐᐊᕋᒥ ᐃᓕᓐᓂᐊᕐᕕᐊᓗᖕᒥ, ᓖᕕ ᑕᐹᑦᓯᐊᖅ ᐱᖃᑕᐅᖏᓐᓇᖅᐸᒃᑐᖅ ᐱᒃᑯᒋᔭᐅᓪᓗᓂᓗ ᐋᖅᓯᒃᑯᑦ ᐊᔪᖖᒋᓐᓂᕐᓄᑦ ᖁᖖᒋᖅᑕᐅᑎᑦᑎᓂᕐᒥᒃ ᐱᖖᒍᐊᖅᑎᓪᓗᒋᑦ. ᐊᐅᓚᑦᑎᔨᐅᓕᖅᑐᖅ ᐃᓕᓐᓂᐊᖅᐸᓪᓕᐊᓪᓗᓂ ᕿᕐᓂᖅᑕᖅ ᑭᑦᑑᕐᓇᕐᒥᒃ, ᐃᓕᑉᐸᓪᓕᐊᓪᓗᓂ ᐃᒡᓗᓕᐅᑉ ᐊᔪᖖᒋᓐᓂᖅᐹᖏᓐᓂᒃ ᖁᕝᕙᖅᑎᕆᖃᑕᐅᓪᓗᓂ ᑐᑭᖃᑦᑎᐊᖅᑐᒃᑯᑦ ᐊᑲᐅᔪᒃᑯᑦ.
ᐹᑐᕆᒃ ᓕᐊᓄᑦ
ᐹᑐᕆᒃ ᓕᐊᓄᑦ-ᐹᑐᕆᒃ ᓕᐊᓄᑦ ᖃᖓᑕᐅᔭᕐᓂᕐᒥᒍᑦ ᐊᕿᑦᑐᖓᓴᖕᓂᕐᒥᒍᓪᓗ ᑲᑉᐱᐊᑦᑕᐃᓐᓂᕐᒥᒍᓪᓗ, ᐱᓵᕿᓂᕐᒥᒍᓪᓗ. ᐃᓚᐅᖅᓯᓂᕐᒥᒃ ᐃᓕᓐᓂᐊᖅᓯᒪᔪᖅ, ᑖᓐᓇ ᑎᓴᒪᐃᓕᖅᑲᖓᔪᒃᑯᑦ ᑕᑯᕋᓐᓈᖅᑎᑦᑎᔨ ᐊᒃᓴᑳᔪᓕᖕᓄᑦ ᐃᖏᕐᕋᕐᓂᒃᑯᑦ ᓵᓚᖃᖅᓯᒪᔪᖅ, ᐃᓕᓐᓂᐊᕇᖅᓯᒪᔪᖅ ᒥᑕᓗᕿᖕᓂᕐᒥᒃ ᐃᓕᓐᓂᐊᕐᕕᖓᓂ ᒪᓐᑐᕆᐊᓪᒥ, ᐱᒋᐊᕈᑎᖃᖅᓯᒪᔪᖅ ᑕᖅᑐᓂᒃ ᑕᕐᓂᕐᓂᒃ ᓂᖅᑐᐃᔨᐅᓪᓗᓂ ᐊᕿᑦᑐᖓᓴᒃᑎᐅᓪᓗᓂᓗ ᑲᓰᓅᖓᓂᑦ ᒪᓐᑐᕆᐊᓪ, ᔮᒪᓂᒥ ᑕᑯᕋᓐᓈᖅᑕᐅᔨᐅᓪᓗᓂᓗ ᒥᑎᑲᓪᓚᖖᒍᐊᑯᓘᓪᓗᓂ, Wintergarten ᐊᒻᒪ Freidrichbau, ᐊᕿᑦᑐᖓᓴᒃᑎᓄᓪᓗ ᓱᐃᔅᒥ Knie, Teatro ZinZanni ᓵᓐᕗᕋᓐᓯᔅᑯᒥ ᐊᒻᒪ Cirque du Soleil. ᓵᓚᖃᐅᓯᐊᖅᓯᒪᔪᖅ Nicouline Prize ᖁᕕᐊᓲᑎᖃᖅᑎᓪᓗᒋᑦ Mondial du Cirque de Demain.
ᓄᓇᒧᑦ ᐃᓅᖃᑎᖃᑦᑎᐊᕐᓂᕐᒥᒡᓗ ᐱᓕᕆᐊᖏᑎᒍᑦ ᐃᑲᔪᓲᖑᒻᒥᔪᖅ ᑕᑯᕋᓐᓈᖅᑎᑦᑎᓪᓗᓂ ᑎᒥᐅᔪᓂᒃ “Dans la rue” ᒪᓐᑐᕆᐊᓪᒥ ᐅᕝᕙᓘᓐᓃᑦ ᑭᑉᐹᕆᒃᑐᒥ ᐊᒻᒪᓗᑭᓵᕐᒥ, ᑐᑭᒧᐊᒃᑎᑕᕕᓂᖓ 2018ᒥ 2019ᒥᓪᓗ ᑐᕌᓐᑐᒥ. ᓴᖅᑮᔨᓄᑦ ᐃᓚᒋᔭᐅᒻᒥᔪᖅ ᑲᑎᒪᔨᖏᓐᓄᑦ Carmagnole. ᐹᑐᕆᒃ ᑕᑯᒥᓇᖅᑐᑎᒍᑦ ᐱᓕᕆᖃᑎᖃᕆᐊᒃᓴᖅ ᖁᕕᐊᒋᔭᖓ: 2015ᒥ, ᑐᑭᒧᐊᒃᑎᑦᑎᔨᐅᖃᑎᖃᓚᐅᖅᓯᒪᔪᖅ ᖃᖓᑕᐅᔭᖅᑐᑎᒃ ᑕᑯᕋᓐᓈᖅᑎᑦᑎᓪᓗᒋᑦ ᒨᐱ ᑎᒃ ᑐᑭᒧᐊᒃᑎᑦᑎᔨ ᑖᒪᓂᒃ ᓵᒻᐸᐃᓐ ᑕᑯᕋᓐᓈᕐᕕᖕᒥ Théâtre du Nouveau Monde. 2019ᒥ, ᑐᑭᒧᐊᒃᑎᑦᑎᓐᓂᕆᓪᓗᓂ Looping for the Comic Opéra (ᓱᐃᑦᓱᓚᓐ) ᐊᒻᒪ 2020, ᓄᑖᒥᒃ Gypsy Kumbia Orchestra (ᑲᓇᑕ).
ᕇᑕ ᑭᓕᐅᕐ-ᒪᐃᒃ
ᕇᑕ ᑭᓕᐅᕐ-ᒪᐃᒃ-ᒨᕐᕕ-ᕇᑕ ᑭᓕᐅᕐ ᐱᕈᖅᓴᓯᒪᔪᖅ ᐸᖕᓂᖅᑑᒥ, ᓄᓇᓕᒃ ᑕᑯᒥᓇᑦᑎᐊᖅᑐᖅ ᕿᑭᖅᑖᓗᖕᒥ, ᓄᓇᕗᒻᒥ. ᐱᓪᓚᕆᒃᑎᐅᖖᒍᐊᕈᓐᓇᕐᓂᖓᑕ ᐃᓚᒋᓪᓗᓂᐅᒃ, ᓂᔾᔭᐅᓯᔭᖅᑎᐅᒋᕗᖅ ᓂᔾᔭᐅᓯᔭᖅᐸᒃᑐᓂ ᑕᐃᔭᐅᓪᓗᓂ ᕇᑦ, ᐊᔾᔨᐅᖖᒋᑦᑐᒥᒃ ᓂᐱᑦᑎᐊᕚᓗᖕᒥᓂᒃ ᑐᓴᖅᓴᐅᑎᑦᑎᓪᓗᓂ. ᒪᒃᑯᒃᑐᑦ ᓂᔾᔭᐅᓯᔭᖃᑦᑕᓕᖅᑎᓪᓗᒋᑦ ᓄᓇᕗᒻᒥ, ᕇᑕ ᑭᐅᕐ ᐱᖖᒍᐊᖃᑎᖃᖃᑦᑕᖅᓯᒪᕗᖅ ᖃᐅᔨᒪᔭᐅᔪᓪᓚᕆᖕᓂᒃ ᑐᓴᕐᓂᔮᖅᑎᓂᒃ ᓄᓇᕗᒻᒥ, ᐱᖃᓯᐅᑎᓪᓗᒋᑦ ᑐᐃᓐ ᕙᓚᐃᒻᔅ, ᐃᓕᓴᐱ ᐊᐃᓴᒃ, ᔨᐅᕆ ᑳᓐᔅ, ᐱᖖᒍᐊᓚᐅᖅᓯᒪᒋᓪᓗᓂ 2018 ᔫᓅ ᓵᓚᖃᕋᓱᒃᑎᓪᓗᒋᑦ.
