ᑕᒃᓂᖅᓴᒥᒃ ᑕᑯᑦᑎᑦᑎᓂᖅ-ᐋᖅᓯᒃᑯᑦ ᓴᓇᑐᔪᑦ ᐱᒋᐊᓯᑎᓪᓗᒋᑦ ᐊᓯᔾᔨᖅᐸᓪᓕᐊᓯᒪᕗᑦ ᐅᑭᐅᓂᒃ 18ᓂᒃ, ᐱᕙᓪᓕᐊᓂᖃᖅᑎᓪᓗᒋᑦ ᑕᑯᕋᓐᓈᖅᑕᐅᔪᒃᓴᒥᒃ. ᐅᓂᒃᑳᖅᑐᐊᑦ ᐱᒋᐊᖅᓯᒪᔪᖅ ᐋᖅᓯᒃᑯᑦ ᐱᖖᒍᐊᖅᑕᐅᓂᐊᖅᑐᓂᒃ ᑐᑭᒧᐊᒃᑎᑦᑎᔨᖏᒃ ᒋᔫᒻ ᐃᑦᑐᒃᓵᕐᔪᐊᑦ ᓴᓚᑎᓐ ᐊᒻᒪ ᑎᐅᕆ ᐅᔭᕋᒃ, ᓯᑕᒪᐅᔪᖖᒋᒐᖅᑐᓂᒡᓗ ᐃᓄᒐᖖᒍᐊᓖᑦ ᐹᑐᕆᒃ ᓕᐊᓄᑦ ᐊᒻᒪ ᑕᖅᑯᑦ ᑕᕐᕆᔮᒃᓴᓕᐅᖅᑎᒃᑯᑦ ᓗᐃᔅ ᕝᓚᕼᐅᕐᑎ ᓴᖅᑮᖃᑎᒌᑦᑎᓪᓗᒋᑦ ᓄᓇᕗᒻᒦᖖᒑᖅᓯᒪᔪᒥᒃ ᐃᓄᖕᓄᑦ ᐃᓚᔾᔪᖖᒍᓇᖅᑐᒥᒃ, ᑲᓇᑕᒥᐅᓄᓪᓗ, ᓄᓇᕐᔪᐊᕐᒥᐅᓄᓪᓗ, ᓴᖅᑭᔮᖅᑎᑦᑎᓪᓗᒋᑦ ᒪᒥᓴᕐᓂᕐᒥᒃ ᓄᓇᖃᖅᑳᖅᓯᒪᔪᓪᓗ ᖃᐅᔨᒪᔭᖏᓐᓂᒃ ᔭᒐᐃᓕᕐᓂᕐᒥᒃ, ᐅᖃᐅᓯᕐᓂᒃ, ᐱᒋᐊᖅᑎᑦᑎᒃᑲᓐᓂᕐᓗᓂᓗ ᐊᑕᖅᑭᒍᓱᖕᓂᒃᑯᑦ ᐱᖖᒍᖅᑎᑦᑎᓪᓗᑎᒃ ᓴᐃᒪᖃᑎᒌᖕᓂᕐᒥᒃ. ᑕᐃᒪᐃᓕᐅᖅᑎᓪᓗᒋᑦ, ᐃᓄᐃᑦ ᓂᔾᔭᐅᓯᔭᖅᑎᑦ, ᑕᑯᕋᓐᓈᖅᑎᑦᑎᔨᓪᓗ, ᑕᑯᒥᓇᖅᑐᓕᐅᖅᑎᑦ ᑐᓴᕐᓂᖅᑐᓕᐅᖅᑎᓪᓗ ᔨᕐᒪᐃᓐ ᐊᕐᓇᑦᑕᐅᔪᖅ, ᕇᑦ, ᓵᓚᑦ ᖃᒪᓐᖅ, ᔮᓱᐊ ᖃᐅᒻᒪᒋᐊᖅ, ᑎᐅᕆ ᐅᔭᕋᒃ, ᓵᓕ ᑯᐊᑕ, ᑯᕆᔅᑏᓐ ᑐᑐ, ᓖᕕ ᑕᐹᑦᓯᐊᖅ, ᔮᑭ ᖁᓐᓄᑦ, ᐋᓕᒃᔅ ᐊᕐᓇᑦᓯᐊᖅ, ᐱᓕᕆᖃᑎᒌᒃᓯᒪᕗᑦ.

ᑕᐃᒪᖖᒐᓂ, ᐱᔾᔪᑎᖃᓪᓗᐊᑕᖅᓯᒪᔪᑦ ᓴᖅᑭᔮᖅᑎᑦᑎᔪᒪᓪᓗᑎᒃ ᐊᔪᖖᒋᓐᓂᖏᓐᓂᒃ ᐃᓄᐃᑦ ᑕᑯᒥᓇᖅᑐᓕᐅᖅᑎᑦ ᑐᓴᕐᓂᖅᑐᓕᐅᖅᑎᓪᓗ ᑲᓇᑕᓕᒫᒥ ᓄᓇᕐᔪᐊᕐᒥᓪᓗ ᓴᖅᑭᔮᖁᓪᓗᒋᑦ, ᐊᔾᔨᐅᖖᒋᑦᑐᒥᒡᓗ ᐃᓕᖅᑯᓯᖃᑎᒌᖖᒋᑦᑐᓂᒃ ᐱᓕᕆᖃᑎᒌᖕᓂᖏᓐᓂᒃ ᐱᓕᕆᐊᑉ ᑭᖑᓂᐊᒍᑦ. ᑕᐃᒪᐃᒻᒪᑦ, ᐅᓂᒃᑳᖅᑐᐊᑦ ᓴᖅᑭᑎᑕᐅᕗᖅ ᐊᔾᔨᖃᖖᒋᑦᑐᖅ ᐱᖖᒍᖅᐸᓪᓕᐊᑎᓪᓗᒍ ᐃᓄᐃᑦ ᐃᓕᖅᑯᓯᖏᑕ ᓇᓕᖃᖏᓐᓂᖓᓂᒃ ᑕᑯᒥᓇᖅᑐᓕᐅᖅᑎᓂᒃ ᓇᑭᑐᐃᓐᓈᖅᓯᒪᔪᓂᒃ ᐱᓕᕆᖃᑎᒌᑎᓪᓗᒋᑦ.

ᐅᓂᒃᑳᖅᑐᐊᑦ ᐊᐅᓚᔾᔭᒋᐊᖅᑎᑕᐅᓚᐅᖅᐳᖅ ᐊᔾᔪᒥᒍᓱᒃᑐᑎᒃ ᐱᙳᕐᓂᕆᕕᓂᕐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐊᔾᔨᒌᑦᑎᐊᖖᒋᒃᑲᓗᐊᖅᑎᓪᓗᒋᑦ ᓄᓇᓕᓕᒫᓂ, ᑲᑎᔾᔪᑕᐅᕙᒃᐳᑦ ᓯᕗᓕᑦᑎᓐᓃᖖᒑᖅᑐᑦ. ᐃᓄᖕᓄᑦ ᐊᒥᓱᓄᑦ, ᐱᖖᒍᕐᓂᕕᓃᑦ ᐊᒃᑐᐊᔾᔪᑕᐅᖕᒪᑕ ᐱᒋᐊᕐᕕᕕᓂᖏᓐᓄᑦ ᑭᓇᐅᓂᕐᒥᓄᓪᓗ. ᐊᐃᑦᑖᖑᒐᓗᐊᖅ, ᐅᓂᒃᑲᐅᓯᐅᖃᑦᑕᖅᓯᒪᔪᑦ ᐳᐃᒍᖅᑕᐅᓕᕐᒪᑕ ᐃᓄᖕᓄᑦ ᒪᒃᑯᒃᑐᓄᑦ ᐃᓕᖅᑯᓯᕐᒥᓄᑦ ᐊᒃᑐᐊᔪᓐᓃᖅᑐᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᕐᓂᕕᓂᕐᓄᑦ, ᐃᓄᐃᑦ ᒪᒃᑯᒃᑐᑦ ᑐᖖᒐᓇᓱᐊᒡᒐᕐᒪᑕ ᒫᓐᓇᐅᓕᖅᑐᖅ ᐃᓅᓯᖃᓕᖅᑎᓪᓗᒋᑦ. ᐅᓂᒃᑳᖅᑐᐊᒥ, ᐃᓄᐃᑦ ᑕᑯᒥᓇᖅᑐᓕᐅᖅᑏᑦ ᑕᓴᕐᓂᖅᑐᓕᐅᖅᑏᓪᓗ ᑐᖖᒐᕐᓂᕐᒥᓂᒃ ᐱᖅᑯᓯᑐᖃᕐᒥᓄᑦ ᖃᐅᔨᕙᓪᓕᐊᓚᐅᖅᑐᑦ ᐱᓕᒻᒪᒃᓴᖅᐸᒃᑐᑎᒃ ᖃᐅᔨᓇᓱᐊᖅᑐᑎᒡᓗ ᐃᒻᒥᒃᑯᓪᓗ ᐅᑎᖅᑎᑦᑎᕙᓪᓕᐊᓕᖅᑐᑎᒃ ᐊᔪᖖᒋᑕᒥᒍᑦ. ᑕᑯᒥᓇᖅᑐᓕᐅᕐᓂᒃᑯ ᑐᓴᕐᓂᖅᑐᓕᐅᕐᓂᒃᑯᓪᓗ ᐃᓄᐃᑦ ᑭᒡᒐᖅᑐᖅᑎᕈᒃᑲᓐᓂᕐᒧᑦ. ᑕᐃᒫᔅᓴᐃᓐᓇᖅ, ᐃᓅᖖᒋᑦᑑᒐᓗᐊᑦ ᖃᐅᔨᓇᓱᐊᖅᓯᒪᕗᑦ, ᓴᖅᑭᔮᖖᒋᑦᑐᓂᒃ ᐱᖖᒍᕐᓂᕕᓂᕐᓂᒃ ᑲᓇᑕᒥ ᐊᑐᓚᐅᖅᑐᕕᓂᕐᓂᒃ ᐃᓕᖅᑯᓯᕆᔭᖏᓐᓂᒡᓗ. ᑲᑎᑦᑐᒋᑦ, ᐱᓕᕆᖃᑎᒌᖕᓂᖅ ᖁᕕᐊᓲᑎᖃᖅᐳᖅ ᐃᓄᐃᑦ ᑲᓇᑕᒥᐅᑕᐃᓪᓗ ᐃᓕᖅᑯᓯᖏᓐᓂᒃ ᓴᖅᑮᓪᓗᑎᒃ ᐊᔾᔨᒌᖕᓂᖏᓐᓂᒃ ᑲᓇᑕᒥᐅᑕᐃᑦ ᑐᑭᓯᓇᓱᐊᖅᑐᑎᒃ ᐱᒋᐊᕐᓂᕕᓂᖏᓐᓂᒃ, ᑭᓇᐅᓂᖏᓐᓂᒃ, ᓇᒧᖖᒐᖅᐸᓪᓕᐊᓂᖏᓐᓂᒡᓗ, ᐱᖖᒍᕐᓂᖏᓐᓂᒃ ᐃᓅᖃᑎᒌᑦ ᖃᐅᔨᕙᓪᓕᐊᓪᓗᑎᒃ.

ᐊᔪᖖᒋᓐᓂᕐᒥᑎᒍᑦ ᑕᑯᕋᓐᓈᖅᑎᑦᑎᔩᑦ, ᓂᔾᔭᐅᓯᔭᖅᑏᑦ, ᐱᓪᓚᕆᖖᒍᐊᖅᑏᑦ, ᑕᕐᕆᔭᐅᓯᐅᖅᑎᓪᓗ ᓴᖅᑮᕗᖅ 90 minutesᓂᒃ ᑕᑯᕋᓐᓈᖅᑎᑦᑎᓪᓗᑎᒃ. ᓴᓇᑐᓂᖏᑦ ᕿᒥᕐᕈᕗᑦ ᕿᓂᖅᑐᑎᒡᓗ ᐊᔾᔪᒥᓇᖅᑐᓂᒃ ᐃᓄᐃᑦ ᐃᓱᒻᒪᔾᔫᓂᖏᑎᒍᑦ ᓲᕐᓗ ᑲᑕᔾᔭᕐᓂᖅ ᕿᓚᐅᔾᔭᕐᓂᕐᓗ, ᐱᖅᑯᓯᑐᖃᕐᓂᒡᓗ ᓲᕐᓗ ᐊᖑᓇᓲᓯᖏᓐᓂᒃ ᓴᓇᐅᒐᖏᓐᓂᒃ (ᐃᒡᓗ, ᖃᔭᖅ, ᐅᓗ ᐊᓯᖏᓪᓗ), ᐱᖖᒍᐊᕐᓂᖏᑎᒍᑦ ᓵᓚᒋᖃᑦᑕᐅᑎᓇᓱᒃᑐᑎᒃ, ᑕᑯᒥᓇᖅᑐᓂᒃ ᐊᓐᓄᕌᖃᐅᓯᖏᑦᑎᒍᑦ ᓄᓇᑯᓗᐊᓂᒡᓗ. ᐃᓄᐃᑦ ᑕᒃᑯᐊᖏᑦ ᐃᓱᒻᒪᓯᖏᓪᓗ ᐱᓕᕆᐊᒦᓚᐅᖅᑐᑦ. ᑕᒻᒪᐅᓯᐅᒐᔪᒃᑐᖅᑕᖃᓚᐅᕐᒥᔪᖅ ᐃᓕᖅᑯᓯᖃᑎᒌᖖᒋᑦᑐᑦ ᐱᓕᕆᖃᑎᖃᑎᓪᓗᒋᑦ ᐃᓄᖕᓂᒃ, ᖃᓪᓗᓈᑦ ᐃᓱᒪᒋᔭᖏᓐᓂᒃ ᑲᐃᒻᒥᐊᖅᓯᓇᓱᓕᔭᖕᒪᑕ ᐃᓄᐃᑦ ᐱᓕᕆᐊᖏᓐᓄᑦ. ᐃᓄᐃᑦ ᓂᖅᐱᖅᑯᖅᑐᔪᐊᓘᓲᖑᖖᒋᒻᒪᑕ, ᓂᓪᓕᐊᔾᔪᑎᖃᖅᑐᑎᒃ ᓂᓪᓕᐊᔾᔪᑎᒋᔭᕆᐊᓕᑐᐊᕐᒥᖕᓂᒃ, ᓴᐃᓕᓪᓗᑎᒃ, ᑕᒪᓐᓇ ᐅᔾᔨᕆᔭᐅᔪᓐᓇᖖᒋᒻᒪᑦ. ᐅᓂᒃᑳᖅᑐᐊᑦ ᓴᓇᔭᐅᓂᖓ ᑕᐃᒪᐃᑦᑐᖃᓚᐅᕆᕗᖅ, ᑭᓯᐊᓂᓕ ᑕᐃᒪᐃᓪᓗᐊᕇᖕᓂᖅ ᐊᑕᖅᑭᒍᓱᖃᑎᒌᖕᓂᕐᓗ ᐱᔪᓐᓇᕐᓂᖃᖅᑐᐃᓐᓇᐅᓂᕐᓗ ᐱᓪᓗᐊᑕᕆᔭᐅᓚᐅᖅᑐᖅ ᐱᓕᕆᑎᓪᓗᒋᑦ ᐋᖅᓯᒃᑯᓪᓗ ᐱᔭᒃᓴᕆᓪᓗᓂᐅᒃ. ᒫᓐᓇ ᑕᕝᕙ ᓴᓇᑐᓂᖅ ᐱᓕᕆᐊᒥᒃ ᐃᓄᐃᓪᓗ ᑐᓴᕐᓂᖅᑐᓕᐅᖅᑏᑦ ᑕᑯᒥᓇᖅᑐᓕᐅᖅᑏᓪᓗ ᐊᔪᖖᒋᓐᓂᖏᓐᓂᒃ ᓴᖅᑭᔮᖅᑎᑦᑎᕗᑦ, ᐅᒃᐱᕆᔭᖏᑦ ᐊᔾᔨᒌᖖᒋᒃᑲᓗᐊᖅᑎᓪᓗᒋᑦ ᐊᑕᖅᑭᒍᓱᖕᓂᖅ ᑕᑎᖃᕐᓂᕐᓗ ᐃᓄᖕᓂᒃ ᐃᓅᖖᒋᑦᑐᓂᒡᓗ ᐱᓪᓚᕆᐅᓚᐅᖅᐳᖅ. ᑕᐃᒪᐃᒻᒪᑦ, ᐅᓂᒃᑳᖅᑐᐊᑦ ᑕᐃᒫᒃ ᐊᓯᔾᔨᕐᓂᕐᒥᒃ ᓴᖅᑭᔮᖅᑎᑦᑎᕗᖅ ᑕᑯᒥᓇᖅᑐᓕᐅᖅᑎᓂᒃ ᑐᓴᕐᓂᖅᑐᓕᐅᖅᑎᓂᒡᓗ  ᐃᓄᐃᑦ ᑲᓇᑕᒥᐅᓪᓗ ᐊᔾᔨᒌᖖᒋᓐᓂᖏᓂᒃ ᑐᖖᒐᓱᒃᑎᑦᑎᓪᓗᑎᒃ. ᐱᓕᕆᐊᖅ ᐅᒃᑯᐃᖅᓯᕗᖅ ᐃᓄᖕᓂᒃ ᑲᓇᑕᒥᐅᓂᒡᓗ ᐅᖃᐅᓯᖃᖁᓪᓗᒋᑦ ᐃᓄᐃᑦ ᓯᕗᓂᒃᓴᖏᓐᓂᒃ ᓄᓇᖏᑕ, ᑲᓇᑕᐅᓪᓗ, ᓄᓇᖃᖅᑳᖅᓯᒪᔪᓕᒫᓪᓗ ᓄᓇᕐᔪᐊᕐᒥ. ᐅᔾᔨᕆᖖᒋᑕᒃᓴᐅᖖᒋᒻᒪᑦ, ᓴᓇᕙᓪᓕᐊᓪᓗᓂ ᐃᓕᖅᑯᓯᒃᑯᑦ ᑕᐃᒪᐃᓪᓗᐊᖃᑎᒌᖕᓂᕐᒥᒃ ᐃᓱᒫᓘᑕᐅᔪᑦ ᐱᓕᕆᑎᓪᓗᑕ ᑖᔅᓱᒥᖓ ᐊᔭᐅᖅᑐᐃᖕᒪᑦ ᑕᑯᒥᓇᖅᑐᓕᐅᖅᑎᓂᒃ ᑐᓴᕐᓂᖅᑐᓕᐅᖅᑎᓂᒡᓗ ᐊᒃᑐᐃᓂᖃᖅᑎᓪᓗᒋᑦ ᐊᑯᓃᕐᓂᐊᖅᑐᒃᑯᑦ ᐃᓄᐃᑦ ᐃᓅᖖᒋᑦᑑᒐᓗᐊᓪᓗ ᓄᓇᖏᓐᓂ.

ᐅᓂᒃᑳᖅᑐᐊᑦ ᑐᖖᒐᓱᒃᑎᑦᑎᑐᐃᓐᓇᖖᒋᓚᖅ ᑲᓇᑕᒥᐅᑕᓂᒃ ᑕᑯᓐᓇᖅᑎᓂᒃ ᖃᐅᔨᕙᓪᓕᐊᑎᓪᓗᒋᑦ ᐃᓄᐃᑦ ᐃᓕᖅᑯᓯᖏᓂᒃ ᐊᑕᖅᑭᒍᓱᒡᓗᑎᒃ, ᐃᒃᐱᒍᓱᒃᑎᑦᑎᕗᑦ ᐊᒃᓱᕈᕐᓇᕐᓂᖓᓂᒃ ᑭᓇᐅᓂᕐᒥᒃ ᓇᓗᓕᓕᖅᑎᓪᓗᒋᑦ ᐃᓕᖅᑯᓯᒃᑯᑦ ᐃᓱᒻᒪᓯᖏᓂᑦ ᐊᓯᔾᔨᖅᑎᓪᓗᒋᑦ ᐃᓕᖅᑯᓯᖏᓪᓗ. ᓴᓇᓂᖅ, ᑕᑯᓐᓇᖅᑎᑦᑎᓂᖅ, ᓯᐊᒻᒪᒃᑎᖅᑕᐅᕙᓪᓕᐊᓂᖓᓗ ᐅᓂᒃᑳᖅᑐᐊᑦ ᑲᓇᑕᒥ ᐅᑭᐅᖅᑕᖅᑐᖏᓐᓂᒡᓗ ᓄᓇᕐᔪᐊᑉ ᐊᒃᑐᐃᕗᖅ ᐊᒥᓱᐊᓗᖕᓂᒃ ᐃᓄᖕᓂᒃ. ᐱᒋᐊᖅᑎᑕᐅᓗᓂ ᐋᖅᓯᒃᑯᓐᓄᑦ ᒪᕐᕉᖕᓄᓪᓗ ᐱᓕᕆᕖᖕᓄᑦ ᐊᑕᖅᑭᒍᓱᖕᓂᕐᒥᑎᒍᑦ ᑕᑯᒥᓇᖅᑐᓕᐅᕐᓂᕐᒥᒃ/ᑐᓴᕐᓂᖅᑐᓕᐅᕐᓂᕐᒥᒃ ᓴᖅᑮᒋᕗᑦᑕᐅᖅ, ᐅᓂᒃᑳᖅᑐᐊᑦ ᓴᖅᑭᔮᖅᑎᑦᑎᕗᖅ ᐃᓄᐃᑦ ᑐᓴᕐᓂᖅᑐᓕᐅᕈᓯᖏᓐᓂᒃ ᑕᑯᒥᓇᖅᑐᓕᐅᕈᓯᖏᓐᓂᒡᓗ ᑲᓇᑕᓕᒫᒥ ᓄᓇᖏᓐᓂᒡᓗ ᓴᓇᑐᓂᕐᒥᓂᒃ ᑕᑯᓇᖅᑐᓕᐅᕐᓂᒃᑯᑦ ᑐᓴᕐᓂᖅᑐᓕᐅᕐᓂᒃᑯᓪᓗ.

ᑕᑯᓐᓇᒐᒃᓴᖅ ᓴᓇᔭᐅᓚᐅᖅᐳᖅ ᐱᖓᓱᓂᒃ ᓄᓇᓕᖕᓂ ᐃᒡᓗᓕᖕᒥ ᒪᓐᑐᕆᐊᓪᒥᓪᓗ. ᐃᒡᓗᓕᖕᒥ ᓴᓇᑐᓂᒃᑯᑦ ᐅᒃᑯᐃᖓᓚᐅᖅᐳᖅ ᓄᓇᓕᖕᒥᐅᓄᑦ ᑕᑯᓐᓇᖅᑕᐅᔪᓐᓇᕐᓂᐊᕐᒪᑦ ᓯᐊᒻᒪᑦᑎᐊᖁᓪᓗᒍ ᐊᒃᑐᐃᓂᖃᖁᓗᒍ ᑕᑯᒥᓇᖅᑐᓕᐅᕐᓂᐅᑉ ᑐᓴᕐᓂᖅᑐᓕᐅᕐᓂᐅᓪᓗ ᐱᐅᔫᓂᖓ. ᐊᔾᔨᖖᒋᓪᓚᕐᓕ ᐋᖅᓯᒃᑯᑦ ᓄᓇᒦᓐᓂᕐᒥᒃ ᐱᖃᓯᐅᔾᔨᕙᖕᒪᑕ. ᐃᓄᖕᓄᑦ, ᓄᓇᒦᓐᓂᖅ ᐃᓱᒻᒥᕐᓇᕐᒪᑦ ᑕᕐᓂᕐᒧᓪᓗ ᐱᐅᓪᓗᓂ ᓴᓇᑐᓂᕐᒧᓪᓗ. ᑕᑯᒃᓴᐅᑎᑦᑎᓇᕐᒥᖕᒪᑦ ᐅᑭᐅᖅᑕᖅᑑᑉ ᐱᐅᔫᓂᖓᓂᒃ ᐃᓄᐃᓪᓗ ᐊᓐᓇᐅᒪᔪᓐᓇᕐᓂᖏᓐᓂᒃ.

ᓴᖅᑭᔮᖅᑎᑦᑎᓂᖃᖅᑎᓪᓗᒋᑦ ᔮᓐᓄᐊᕆ 2020ᒥ, ᓄᓇᕐᔪᐊᖅ ᐊᒃᑐᖅᑕᐅᕐᔪᐊᓚᐅᕐᒪᑦ ᖃᓂᒪᔾᔪᐊᕐᓇᕐᒧᑦ. COVID-19 ᓄᕙᒡᔪᐊᕐᓇᖅ ᐊᒃᑐᐃᓚᐅᕐᒪᑦ ᑕᒪᐃᓐᓂ ᐊᔾᔨᒌᖖᒋᑦᑐᑎᒍᑦ. ᓄᕙᒡᔪᐊᕐᓇᖅ ᒪᑐᓯᑐᐃᓐᓇᓚᐅᖖᒋᓚᖅ ᓄᖅᑲᖅᑎᑦᑎᓚᐅᖅᑐᖅ ᐊᐅᓪᓚᕋᕐᓂᕐᒥᒃ ᓄᖅᑲᖅᑎᑦᑎᓪᓗᓂᒡᓗ ᐅᓂᒃᑳᖅᑐᐊᑉ ᑕᑯᕋᓐᓈᖅᑕᐅᓂᖓᓂᒃ ᑲᓇᑕᒥ ᓄᓇᕐᔪᐊᕐᒥᓗ, ᐊᒃᑐᐃᓚᐅᕐᒥᔪᖅ ᐱᓕᕆᖃᑎᒌᖕᓂᖏᓐᓂᒃ ᑕᑯᒥᓇᖅᑐᓕᐅᖅᑏᑦ ᑐᓴᕐᓂᖅᑐᓕᐅᖅᑏᓪᓗ.